> Outeiro de Rei (San Xoán)
Imagen Parroquia pertencente ó arciprestado de Aguiar, provincia e diocese de Lugo. Anexa ás parroquias de Santa María (N.), Bonxe (LE.), Robra (S.) e Caboi e Martul (OE.); presenta unha extensión de 3,2 km².





Conta con 706 veciños distribuídos nos cinco barrios nos que se divide a citada parroquia:

- Barciela (22 veciños)
- Outeiro de Rei (279 veciños)
- Santa Isabel (183 veciños)
- Cantón (142 veciños)
- A Palloza (80 veciños)

Alcanza a súa máxima altitude no barrio de Outeiro de Rei (414 m.) e, bañada polo arroio de Barciela, nela conflúen os ríos Miño e Ladra nun lugar de gran beleza paisaxística que recibe o nome de Campo de Santa Isabel ou As Veigas, e que é empregado como lugar de espallamento e baño por persoas deste e outros municipios.

Imagen Imagen
Campo de Santa Isabel Campo de Santa Isabel

A capital de Concello, á cal se lle outorgou o título de vila durante a Idade Moderna, estivo baixo a xurisdición do Conde de Lemos, Trastámara e Sarria dende o ano 1360, cando mediante privilexio de Pedro I fíxose mercé ó seu alférez maior, Fernando de Castro, desta e outras posesións. A pesar de que durante 150 anos, aproximadamente, a vila pasou por diversas mans: Fadrique de Aragón, Gutierre de Quijada, Pedro de Luna…etc, no ano 1501 reintegrouse ó patrimonio da casa de Lemos mediante privilexio da raíña Isabel A Católica.

Do seu patrimonio histórico-artístico compre destaca-la chamada Casa-forte de Outeiro de Rei, tamén chamada da señorita, fundada polo conde O'Kelly é derivación, para moitos, dunha importante torre medieval. Así como o muíño e capela emprazados no Campo de Santa Isabel.

Loxicamente ó estar a capital municipal nesta parroquia, encontramos unha maior concentración de servizos. En primeiro lugar a Casa do Concello, un edificio tradicional de dúas plantas, con porta de acceso de dintel de arco de medio punto, balcón de ferro e frontón cornixa, cun frontis triangular onde se distingue o escudo do Municipio.

Podemos citar tamén o Colexio de Educación Infantil e Primaria Laverde Ruiz, a Casa da Cultura onde se atopa a Biblioteca Municipal e os servizos de Cultura e Deportes, un PAC, un Centro de Saúde, unha residencia de anciáns privada Residencial Carlos IV, unha farmacia, un supermercado, unha oficina de correos, o Xulgado de Paz, unha oficina bancaria de Caixa Rural Galega, o hostal-restaurante Soborvila, e outros varios establecementos máis de hostalería.
Ademais dende o ano 2009 hai unha gardaría municipal.

> Festividades:

Celébrase durante tres días no mes de xullo unha festa en honor á súa patroa, Santa Isabel. É unha festa de tradición e que goza de recoñecido prestixio na zona. Antigamente festexábase tamén o San Blás (en febreiro).

No primeiro sábado do mes de xullo celébrase a Feira da Artesanía na praza da vila organizada polo Concello, feira que cada ano vai gañando un maior protagonismo no calendario cultural e festivo do verán. Celébrase dende o ano 2007 e coincide coas festas patronais. A feira ofrece unha gran variedade de postos de artesanía, alimentación, talleres, actuacións musicais e diferentes demostracións. Tamén contempla a posibilidade de comer na carballeira do Campo da Santa Isabel.

Imagen

CEIP Laverde Ruíz

   
Concello de Outeiro de Rei
Praza do Concello, núm. 1 - 27150 Outeiro de Rei
Telfs: 982393281 / 982393055 Fax: 982 393 112
Diseño web de Lugonet
 
Esta web utiliza cookies para analizar e mellorar os seus servizos, continuar coa visita supón a súa aceptación. Información sobre o uso de cookies .